Бердәм дәүләт имтиханында дөрес җавапларны күчерү элек бик авыр һәм җайсыз булса, бүген әле ул кесәгә дә шактый сугачак. Әлеге норма чыгарылыш сыйныф укучыларына гына түгел, аларның укытучыларына һәм мәктәп директорларына да кагыла. Россия Мәгариф күзәтчелеге аңлатуынча, яңа җәза Россия Федерациясенең Административ хокук бозулар Кодексына яңа төзәтмәләр кертү сәбәпле мөмкин булды.
Шулай да мәктәп укучыларының бәхете бар. "Шпаргалка” яисә башка төр хәрәмләшү өчен кызлар-егетләрне 3 меңнән 5 меңгә кадәр генә штраф көтә. Россия мәгариф күзәтчелеге ассызыклавынча, БДИга телефон алып керүчеләр дә шундый ук җәзага тартылачак.
Педагогларга исә кырысрак таләпләр куелган. Укучуга ярдәм иткәндә "тотылган” мөгаллимгә 20 меңнән 40 меңгә кадәр штраф салыначак. Законны үтәмәүче исеменә административ протокол төзелә һәм судка җибәреләчәк. Соңгысы, үз чиратында, штрафның күләмен билгеләячәк. Яңа төзәтмәләр буенча, бланк тутыру кагыйдәләрен тиешенчә аңлатмаган яисә БДИны уздыру инструкциясен өтернә кадәр үтәмәгән педагогларны да җәза көтә. Укучылары тиешле дәрәҗәдә белем алмаган директорларга да 50-100 мең сум күләмендә штраф каралган. Ләкин шунысы да бар, штраф салынганчы, хокук бозуларның барысын да исбатларга кирәк.
Россия Федерациясенең Административ хокук бозулар Кодексына кертелгән яңа төзәтмәләр турында СЕЗ нинди фикердә?Чыганак: belem.ru