Тиздән авиация өлкәсендә эшләүчеләр дә (очучы, диспетчер, штурман, һ.б.) мәҗбүри рәвештә бердәм дәүләт имтиханын тапшыра башлаячак. Россия Транспорт министрлыгы бердәм дәүләт имтиханнарына кертеләчәк сораулар исемлеген төзегән инде. Бу һөнәр ияләре имтиханнарны уңышлы тапшырган очракта гына авиация тармагында хезмәт куя алачак.

Хәзерге вакытта министрлык тарафыннан имтихан өчен 20 меңнән артык сорау әзерләнгән. Бер билетка, кай­сы һөнәр иясе өчен тө­зелгән булуына карап, 20-40 сорау кертеләчәк. Очучыларга сорауларны аеруча мулдан "яудырачаклар”. Иң аз сорауга бортпроводник­лар җавап бирәчәк. Имтихан компьютер ярдәмендә тапшырылачак. Ләкин министр­лыкта сынауны гадәти тәр­типтә, ягъни укытучы каршы утырып (бу очракта – белгеч), билеттагы сорауларга телдән җавап бирү рәвешен­дә кабул итәргә кирәк дигән тәкъдим дә бар.

Имтиханны яхшы бил­гегә тапшырган хезмәткәргә яңа үрнәк буенча эшләнгән таныклык биреләчәк. Аларның исемнәре авиация­нең махсус базасына керте­ләчәк. Россия Транспорт ми­ни­стрлыгының гражданлык авиациясе өлкәсендә дәүләт сәясәте департаменты җи­тәкчесе урынбасары Андрей Шнырев бу уңайдан: "Әлеге кагыйдәләр һава юллары өлкәсен тиешле әзерлеге булмаган хезмәткәрләрдән арындырачак”, – дип бел­дергән.

Элеккеләреннән аермалы буларак, яңа таныклык­лар кулдан түгел, махсус программа ярдәмендә махсус принтерда басылачак. Белгечләр, махсус тышча бе­лән капланган таныклыкка үзлегеңнән бернинди тө­зәтмә кертеп булмаска тиеш, дип ышандыра. Өстә­венә яңа таныклыкта хез­мәткәр­нең кайсы ил гражданины икәнлеге дә күрсә­теләчәк.

Таныклыкның яраклылык срогы хезмәткәрнең белгечлеге, әзерлек дәрә­җәсе һәм инглиз теле буенча тапшырган имтиханның нә­тиҗәләренә  карап билгелә­нәчәк. Әйтик, хезмәткәр инглиз телен Халыкара гражданлык авиациясе оешмасы (ИКАО) тарафыннан расланган күрсәткеч буенча дүр­тенче дәрәҗәдә белсә, ул таныклыкны һәр өч ел саен алыштырырга тиеш булачак. Телне алтынчы дәрәҗәдә белсә, таныклыкны яңартып тору мәҗбүри түгел.